呢排好多食生蚝中毒新聞，但我唔驚，因為有行政總廚 Ricks路嘛。选生蚝一定要专业，有人將急凍、冰鮮生蚝扮新鮮生蚝， Ricks哥好易分辨，我將佢綜合為「情人三部曲」。
要合眼緣又要索
第一「合眼緣」，新鮮生蚝表面有光澤，因為只係離開海水冇耐。
第二「親密接觸」，將隻生蚝拎上手，新鮮生蚝特別墜手，因為仲保存水份；仲可以細細力敲，有空洞洞回音，即係水份已經流失晒，唔夠新鮮。
第三係「要索」，用個鼻索佢有冇海水鹹味，係就夠晒新鮮。
如果仲驚隻生蚝唔新鮮，而且，老闆見你搞咁多都唔趕你走， Ricks哥話仲可以「攻擊佢」，用刀或叉掃開生蚝群邊，如果新鮮，群邊會收縮：「唔好篤肉喎，因為蠔敏感部份係群邊度。」佢話9月開始係法國等台山生蚝最肥美季節，一隻靚約40蚊至80蚊，食完after tasting可停留15分鐘。佢話我點食最正，我話我都識啦，即場示範佢睇。先飲啖清淡白酒或香檳，放隻生蚝入口咬兩啖，將吞未吞之際，再飲少少酒，等生蚝鮮味湧出！嘩！我食完之後問佢係咪咁，只見佢呆兩秒先答：「係呀。」
