如果要數自助餐當中最搶手嘅食物，大家覺得會係咩呢﹖我嘅答案就當然係非蚝莫屬喇！相信台山生蚝對好多食客嚟講都有無窮嘅吸引力，而喺嚟緊十二月份就係我哋本地蚝最肥美嘅時候。
其實早喺一千多年前，中國已開始有人養蚝，當時嘅蚝都係用嚟進貢皇帝，但係由於路途遙遠，唯有將新鮮嘅蚝曬成蚝豉。最出名嘅產地有廣東沙井、潮汕、台山等等。宜家已經推出咗好多蚝製嘅食品，例如蚝油，用蚝煮成蚝水作蚝油去調味。
講到台山蚝嘅食法就真係多不勝數，最基本而又最多人鍾意嘅食法就當然係食生蚝喇！自己亦可以喺屋企整返個芝士焗蚝，只需要將芝士條或者芝士粉灑上新鮮嘅台山生蚝上面，放入焗爐焗兩分鐘就完成。鍾意重口味嘅朋友可以試吓黃油金蒜焗台山生蚝，先將蒜粒炸到金黃色，然後拌上黃油，最後灑喺鮮蚝上面再放入焗爐，食之前再擠埋檸檬汁，一定香味四溢。如果你都係“蚝”友嘅話，就唔好錯過十二月嘅肥美鮮蚝喇！
